သူတို့ခေါ်တော့ဒုက္ခသည်၊ကိုယ့်ကိုယ်ကိုတော့တော်လှန်ရေးသမား။ (၁၀) ကိုညို

“သတ်ကုန်ပြီ သတ်ကုန်ပြီ ဆွဲကြပါအုံး လုပ်ကြပါအုံး” “ကိုအဲကြီး..အို့..သေတော့မှာပဲ၊ အောင်ဆန်းလင်းတို့ဆွဲပါအုံး” စူးစူးဝါးဝါးအော်ဟစ်နေတဲ့ ရွှေဘိုကကိုတင်လှနဲ့ကလေးမြို့က မစန်းပွီးတို့အသံကြောင့် ဘားတိုက်ထဲကကျနော်တို့အားလုံး အပြင်ပြေးထွက်လာကြတယ်။ မြင်ကွင်းမှာတော့ သန်သန်မာမာနဲ့မုဆိုးကြီးကိုအဲကြီး မြေပေါ်မှာမှောက်ရက်လဲလို့။ ကလေးမြို့ကလူငယ်တွေ ၀ိုင်းထုကြတဲ့ ဂဲလုံးတွေက ကိုအဲကြီးဘေးးနားပြန့်ကြဲနေတယ်။ ကိုအဲကြီးတော့ တုပ်တုပ်မျှမလှုတ်။ ကလေးမြို့အဖွဲ့တွေ လူခွဲလို့ ထွက်သွားပြီးတဲ့နောက် ကိုအဲကြီးကိုဝိုင်းထူမကြတယ်။ နဖူးနဲ့ ခေါင်းကွဲသွားတယ်။ သွေးတွေစီးကျနေတယ်။မကြာခင် မဏိပူရစစ်သားတွေတက်လာတယ်။ လူကြီးတွေရောပါတယ်။ အခြေအနေမေးမြန်းပြီး ကိုအဲကြီးကိုအမြန်ဆုံး ချန်ဒယ်ဆေးရုံကို ကားနဲ့တင်သွားကြတယ်။ စခန်းတခုလုံး ငြိမ်သက်သွားတယ်။ ဘယ်သူမှစိတ်မကောင်းကြဖူး။ တခါမှအခုလိုသွေးထွက်သံယိုဖြစ်အောင် တိုက်တဲ့ခိုက်တဲ့အထိရန်မဖြစ်ဘူးဖူး။ မကြာခဏတော့ စကားများပြီး ထိုးတော့ကြိတ်တော့မလိုဖြစ်နေကျ။ စခန်းကလူတွေ အုပ်စုအုပ်စုနဲ့ တီးတိုးဝေဖန်နေကြတယ်။ ဟိုအရင်နေ့တွေကတည်းက စခန်းအပြင် ရွက်ဖျင်တဲထိုးအိပ်တဲ့ ကလေးအုပ်စုတွေ အိပ်ရာနား တုတ်တွေ၊ ဂဲတွေစုထားတာတွေ့ဖူးတယ်။ ကိုအဲကြီးကလည်း တောထဲကကောက်ရထားတဲ့ ဂေါ်ရခါးဓားကောက်ကြီးကို ဓားသွေးကျောက်ပေါ်တင်ပြီး လူမြင်ကွင်းမှာ ထက်နေအောင်သွေးပြနေတယ်။ စခန်းမှာက ကြာလေညီညွတ်မှုပြိုကွဲလေပဲ။ အုပ်စုတွေကွဲနေတယ်။ကလေးအုပ်စု၊မန္တလေးအုပ်စု၊မုံရွာအုပ်စု၊ရန်ကုန်အုပ်စု ဆိုပြီး။ပြီးတော့ရှိသေးတယ်၊ ဗကသအုပ်စု၊မကသအုပ်စု၊ဒီငြိမ်းတို့၊မျိုးချစ်တို့နဲ့ အရင်ကမကြားဖူးတဲ့နာမည်တွေကြားနေရတယ်။ အခုကွဲသွားတဲ့ကိုအဲကြီးဆိုတာလည်း ကလေးနယ်ကပဲ တာဟန်းက မုဆိုး။ တုတ်တုတ်ခိုင်ခိုင် ကြမ်းကြမ်းတမ်းတမ်းပုံစံ။လက်ရုံးသိတ်အားကိုးတဲ့လူ။ မာန်မဲခြိမ်းခြောက်နေလို့ ကလေးနယ်သားတွေသိတ်မကြည်ကြဖူး။ဒီလိုနဲ့စကားများပြီး အချင်းချင်းဆော်ကြတာပဲ။ စခန်းမှာလူကလည်းစုံနေပြီ။ ၈၈နိုဝင်ဘာ၊ဒီဇင်ဘာလကစပြီးရန်ကုန်က ကျောင်းသားတွေ ရောက်လာတယ်။ ဗကသပြန်ကြားရေးက သူရိန်တို့ဇော်ထက်တို့။ နောက်ပိုင်းကိုနေနွယ်(ကဗျာဆရာ) ကိုမြင့်စန်း(စာရေးဆရာဌေးမောင်ရဲ့သား)ကိုဝင်းနိုင်ဦး(နိုင်ငံရေးအကျဉ်းသားဟောင်း၊ အာအက်ဖ်အေရေဒီယိုအမှုထမ်းဟောင်း) တို့နဲ့ အသက်၁၆နှစ်နဲ့၁၈နှစ်နဲ့၁၈နှစ်တွေသာရှိသေးတဲ့အခြေခံပညာအထက်တန်းကျောင်း သမဂ္ဂက ကိုနေလင်း(လူရှင်များသမိုင်းရေးတဲ့နိုင်ငံရေးအကျဉ်းသားဟောင်း)နဲ့အဖွဲ့တွေ၊ပန်းချီထိန်လင်းတို့ စစ်နိုင်ဦးတို့လို လူရွှင်တော်တွေလည်းပါလာတယ်။ ယခင်နိုင်ငံရေးသမားဟောင်းတွေနဲ့ ရဲဘော်သုံးကျိတ်ရဲ့အမျိုးအနွယ်တွေလည်းရောက်လာကြတယ်။ ဒီတော့စခန်းနိုင်ငံရေးကမြိုင်မြိုင်ဆိုင်ဆိုင်ဖြစ်လာတယ်။ ရန်ကုန်ကလာတဲ့ ကျောင်းသားတွေထဲမှာ တချို့က ရန်ကုန်မှာအခြေစိုက်တဲ့ အိန္ဒိယသံရုံးက လမ်းစရိတ်ပေးပြီး လွှတ်လိုက်သူတွေလည်းပါတယ်။ ရန်ကုန်အခြေစိုက် နိုင်ငံရေးသမားတွေနဲ့ နိုင်ငံရေးအဖွဲ့အစည်းတွေက စေလွှတ်သူတွေလည်းပါတယ်။ လက်နက်ကိုင်သင်တန်းတွေပေးနေပြီသတင်းကြားလို့ ထွက်လာသူတွေရော၊ လက်နက်ကိုင်ဖို့မဟုတ်ဖူး နိုင်ငံရေးလုပ်ဖို့ဆိုတဲ့ရည်ရွယ်ချက်နဲ့ နှလုံးရည်ဘက်စိတ်ထက်သန်သူတွေလည်းပါကြတယ်။ ဒါပေမဲ့ဘယ်လိုရည်ရွယ်ချက်နဲ့ပဲလာပစေ ဒီဒုက္ခသည်စခန်းထဲကို ရောက်လာတော့တာပဲ။ မိုးရေးမှာရှိတဲ့ ပန်ချာလှမြင့်(မြန်မာပြည်ပေါက်အိန္ဒိယသား၊ကွယ်လွန်)ကိုကူးမား(မိုးရေးကုန်သည်ကြီးများအသင်း) တို့ကအိန္ဒိယဘက်ကမ်းရောက်လာရင်၊ နိုင်ငံရေးခိုလှုံသူမှန်သမျှကို စခန်းထဲသိမ်းကြုံးပို့တော့တာပဲ။ ကျနော်တို့ကသာ ကိုယ့်ဖာသာ တော်လှန်ရေးသမားတွေ၊ဘယ်အဖွဲ့ကိုယ်စားပြုပြီး ဒီကအခြေအနေလာပြီးလေ့လာတာတွေ၊ အဆက်အသွယ်လာယူတာတွေ၊ နိုင်ငံရေးလုပ်ဖို့လာတာ၊ သင်တန်းတက်ဖို့လာတာ စသဖြင့် ရည်ရွယ်ချက်အမျိုးမျိုး ရှိနေလိမ့်မယ်၊ ဒီစခန်းထဲရောက်ရင်တော့ အားလုံးက ဒုက္ခသည်တွေချည်းပဲ။ ပန်းချီစစ်ငြိမ်းအေးကတောင် အဲဒါကိုရည်ရွယ်ပြီး အနက်ရောင်စက္ကူချပ်ကြီးမှာ ကြောင်မျက်လုံးတွေချည်းဆွဲထားတဲ့ ပန်းချီကားလေးတခုဆွဲပြီး မှတ်တမ်းတင်ထားသေးတယ်။ ခေါင်းစဉ်က“အမှောင်ထဲမှာတော့၊ ကြောင်တိုင်းကအနက်” တဲ့။ ခက်တာကဒုက္ခသည်တွေအဖြစ်သာတပြေးတညီထဲရှိချင်ရှိမယ် အတွေးအခေါ်နဲ့ ရည်ရွယ်ချက်တွေ အရည်အချင်းတွေ ခံယူချက်တွေက အမျိုးမျိုးကွဲပြားနေတာကိုး။ ကိုနေနွယ်တို့ ကိုမြင့်ဆန်းတို့က နိုင်ငံရေးသန်လို့ နယူးဒေလီသွားချင်တယ်၊ စခန်းမှာယခင်ရှိပြီးသား ရဲဘော်တွေက လက်နက်ကိုင်သင်တန်းရမယ်လို့ယုံကြည်နေတယ်။ အဲလိုယုံကြည်အောင်လည်း မဏိပူရ အမှတ်(၈)ရိုင်ဖယ်တပ် အကြီးအကဲတွေနဲ့ ထောက်လှမ်းရေးက အယုံသွင်းပြီးချွေးသိပ်ထားတယ်။ “စည်းကမ်းတကျ နေထိုင်ပြီး ကျန်းမာရေးကောင်းအောင် လုပ်ကြပါ၊ မင်းတို့တိုင်းပြည်ကိုမင်းတို့လက်နဲ့ကယ်တင်ရမှာပါ” လို့မိန့်ခွန်းတွေခြွေတာကို ကျနော်တို့ယုံမှတ်ခဲ့တယ်။ ဒါပေမဲ့အခြေအနေက ကြာလာတာနဲ့အမျှ ပြဿနာတွေရှိလာပြီ။ နိုင်ငံရေးလုပ်ဖို့စိတ်ထက်သန်သူတွေက လက်နက်ကိုင်တွေစောင့်ကြပ်ပြီး သံဆူးကြိုးအပြင်ထွက်ခွင့်မရတဲ့ အကျဉ်းသားဆန်ဆန် ဘ၀တွေကိုမလိုလားဖူး။ စခန်းရဲ့ပုံမှန်စည်းကမ်းတွေနဲ့ သင်တန်းတွေမတက်ဖူး။အပြင်ထွက်ပြီး လမ်းကြောင်းရှာလာတယ်။ နေ့စဉ်စခန်းကကျောင်းသားတွေ သံဆူးကြိုးကျော်ပြီး တောလမ်းတွေကနေ အပြင်ထွက် ရွာထဲလဘက်ရေသွားသောက်တယ်။ ချန်ဒယ်သွားပြီး စားစရာဝယ်တယ်။ တချို့ဆိုပါလဲမြို့၊အင်ဖားမြို့ထဲအထိထွက်လည်ကြတယ်။တချို့လည်း ဒီစခန်းမှာတော့ ဘာမှမဖြစ်နိုင်ဖူး၊ မီဇိုရမ်နယ်ဘက်က ချန်ဖိုင်း စခန်းသွားမယ်ဆိုပြီး ခြေလျှင်ထွက်တယ်။ တချို့အဖမ်းခံရလို့ အင်ဖားထောင်ထဲအပို့ခံရတယ်။ ပိုးဆိုးတာက စခန်းရဲ့ကျန်းမာရေးပဲ။ အိမ်သာမလောက်ငှတော့တောထဲဖြစ်သလို အလေးအခင်းသွားတော့ ယင်တွေထူပြောလာတယ်။ ဒီလောက်များတဲ့ယင်ကောင်တွေ ကျနော်အဲဒီတခါပဲမြင်ဖူးတယ်။ မီးဖိုချောင်လည်းမဲနက်ပြွတ်ခဲနေတယ်။ ဘားတိုက်ထဲက နံရံနဲ့၊ခြင်ထောင်ကြိုးတန်းလေးတွေမှာ ညပိုင်းဆို ယင်တွေနဲ့ပြွတ်သိပ်နေတယ်။အချိန်တိုင်းယင်တွေကိုလက်ဝါးနဲ့ခတ်ပြီးနှင်နေရတယ်။ ယင်နှိမ်နင်းတွေလုပ်ရတယ်။မြောင်းဖောက် ဆေးဖြန်းတာတွေလုပ်တယ်။ ဒီကြားထဲဝမ်းရောဂါတွေဖြစ်တယ်။ ဆေးရုံပို့ရတယ်။ဒါနဲ့ လိုအင်ကလည်းမပြည့်၊စိတ်ထွက်ပေါက်လည်းမရနဲ့ စိတ်ကျဝေဒနာခံစားရတာတို့၊ စခန်းကနေ ခိုးထွက်ပြီး ဗမာပြည်ထဲပြန်ပြေးတာတို့၊ရန်ဖြစ်တာတို့ဖြစ်လာတယ်။ တနေ့တော့အပြင်ထွက်တဲ့ကျောင်းသား၂ယောက်မိုးချုပ်မှပြန်လာတော့ အစောင့်အရာရှိစစ်သားက ကြိမ်းမောင်းတယ်။ ဒိုက်ထိုးအပြစ်ပေးတယ်။ ခေါင်းကိုလက်ဝါးနဲ့ရိုက်ပုတ်တယ်။နာနာကျင်ကျင်မဟုတ်ပေမဲ့ ကျနော်တို့အားလုံးကမဏိပူရစစ်သားတွေပါ စိတ်မကြည်လင်တော့ဖူး။ ဒီလူတွေငါတို့ကို ချိုးနှိမ်တယ်၊ ချုပ်နှောင်တယ်လို့ပဲ မြင်နေတော့တာ။ ဒါနဲ့ ကျနော်တို့ထဲကတယောက်က ကသဲစစ်ဗိုလ်ကိုပြန်ခံထိုးတယ်။ အဲဒီမှာကသဲစစ်သားတွေကမကြေနပ်ဖူး။ တောင်ကုန်းအောက်က ကသဲတွေတုတ်တွေကိုင်ပြီးတက်လာတယ်။ စခန်းကကျောင်းသားတွေအားလုံးလဲ ရတဲ့လက်နက် တုတ်၊ဓား၊ခဲတွေကိုင်ပြီး အသင့်ပြင်ထားတယ်။ လူကြီးတွေက ဖြန်ဖြေတယ်။ စစ်တန်းလျှားဘက်က သေနပ်တဒိုင်းဒိုင်းဖောက်ပြီးခြောက်လှန့်တယ်။ကျနော်တို့အားလုံး အစောပိုင်းတော့ စခန်းဝင်းထဲမှာစုဝေးပြီး ၀င်းထဲဝင်လာရင် ပြန်ခုခံဖို့ပြင်ထားကြတယ်။ နောက်တော့ စစ်တပ်အရာရှိ ရောက်လာတယ်။ သူ့ရဲဘော်တွေကို ပြန်ခိုင်းတယ်။ ကျနော်တို့ကို စည်းကမ်းအသစ်ထုတ်တယ်။ အပြင်ကို အလှည့်ကျ၊အသုတ်နဲ့ တရားဝင်တပတ်တခါ ဈေးဝယ်ထွက်ရမယ်။ တရားမ၀င်ထွက်ရင်အချုပ်ထဲပို့မယ်ပေါ့။ စခန်းကလူတွေလည်းအစပိုင်းတော့ဟုတ်သလိုလိုပေါ့၊ နောက်ပိုင်းတော့လည်း ခိုးထွက်ကြတော့တာပဲ။ ထိမ်းမရ၊သိမ်းမရ၊ပြောမရပါဖူး။ ဒီကြားထဲ ကိုရမ်ပေါင်ဆိုတဲ့မီဇိုချင်းရဲဘော်အဖွဲ့နဲ့စာရေးဆရာကောလ်ထန်မောရိယာယ်လ်တို့ကလည်း အုပ်စုခွဲပြီး ကျနော်တို့စခန်းအောက်က ဘားတိုက်မှာသွားနေတယ်။နောက်ပိုင်းသူတို့လည်းဗမာပြည်ထဲပြန်ဝင်သွားတာပါပဲ။ အဲဒီကာလတွေမှာ၊ မြန်မာန၀တအာဏာပိုင်တွေကလည်း နယ်စပ်မြို့အသီးသီးမှာ ကျောင်းသားကြိုဆိုရေးစခန်းတွေ ဖွင့်ထားပြီး ပြည်တော်ပြန်တွေ နေရပ်ပြန်ပို့တဲ့ အစီအစဉ်တွေလုပ်နေတယ်။ ကျနော်တို့စခန်းကလူတွေက တမူးနဲ့ ကလေး၊ကလေးဝ ကြိုဆိုရေးစခန်းတွေမှာ ၀င်ကြတယ်လို့ကြားရတယ်။ ၀င်လာတဲ့ကျောင်းသားတချို့ကိုနောက်ကြောင်းစစ်ဆေးပြီး အချုပ်ထဲထည့်ထားတာ၊ ထောင်ထဲပို့တာတွေလည်းရှိကြတယ်လို့ကြားတယ်။စခန်းကလူတွေလည်း လူသစ်ဝင်လာလိုက်၊ လူဟောင်းတချို့ထွက်ပြေးသွားလိုက်နဲ့ သံသရာလည်နေတယ်။ ညနေတခါမနက်တခါ တန်းစီလူစစ်ရင် ကသဲတွေမရိပ်မိအောင် လူစားထိုးတာတို့၊စားရင်းလိမ်တာတို့အစောပိုင်းမှာလုပ်ပေမဲ့၊ နောက်ပိုင်းကျတော့လည်း ဘာမှမပြောတော့ဖူး။မနက်စာရင်းလာကောက်၊တန်းစီလူစစ်ရင် Run Away(ထွက်ပြေး)ဘယ်နှစ်ယောက်၊ ဖျားနာ ဘယ်နှစ်ဦးဆိုပြီးစာရင်းမှန်ပဲပေးတော့တာ။ ကသဲတွေကလည်း ထွက်ပြေးသူရှိရင် အရင်ကလို လိုက်လံဖမ်းဆီးတာတွေမလုပ်တော့ဖူး။ တနေ့မှာတော့…ကျနော်တို့စခန်းမှာ လူပျောက်မှုတခုဖြစ်သွားတယ်။ ပျောက်တာကလည်း မိန်းခလေး။ မအိတဲ့၊ ကလေးမြို့က။အသားလတ်လတ်၊ခန္ဓာကိုယ်ပြည့်ပြည့်၊မျက်နှာချိုချို၊ချစ်စရာရုပ်သွင်နဲ့ပါ။ ညနေပိုင်းစခန်းမှာလူစစ်တုံးကရှိသေးတယ်။မိုးချုပ်တော့ပျောက်သွားတာ။အားလုံးရုတ်ရုတ်သဲသဲဖြစ်ကုန်တယ်။ ဆူဆဲပြီးဝိုင်းရှာတယ်။ အမှန်တော့ မအိက ရီးစားနဲ့ချိန်းတွေ့တာ၊ သူ့ရီးစားကလည်း စခန်းထဲကဗမာကျောင်းသားမှုတ်ဖူး၊ ကသဲစစ်ဗိုလ်။နာမည်က “ချောင်ဗား”တဲ့။ ကျနော်တို့ကတော့ ဗမာသံနဲ့လွယ်လွယ်ပဲခေါ်တယ် “ကြောင်ပါး”ဆိုပြီး။ မအိကို ကြောင်းပါးကသနားရာကစတာပဲ။ ကလေးမြို့ကကျောင်းသားတွေကလည်း ဘီစကစ်လေးမုန့်လေးစားချင်ရင် မအိကို ယူခိုင်း၊ ကြောင်ပါးကလည်း သနားတော့ပေးတယ်။ဒီလိုနဲ့ နီးစပ်ကုန်တာ။ ကြောင်ပါးကတကယ်မေတ္တာရှိတယ်ဆိုတာ ကျနော်တို့ နောက်ပိုင်းမှသိရတယ်။ထားပါတော့ ကျနော်တို့စခန်းကရဲဘော်အားလုံး မအိကိုမြေလှန်ရှာတယ်။တောထဲရော၊စခန်းပတ်ပတ်လည်တင်မက အရာရှိရိပ်သာ တန်းလျှားက အိမ်ထဲအထိ တုတ်တွေကိုင်ပြီး သွားရှာတာ။ကသဲအရာရှိတွေက ဘာမှမပြောဖူး။ နောက်ဆုံး ကသဲတပ်မှုးကိုတိုင်တယ်။ အဲဒီနေ့မအိကိစ္စဒီအတိုင်းပြီးသွားတယ်။ရှာမရဖူး။ဒါပေမဲ့ အားလုံးသိလိုက်တာကတော့ မအိ ကသဲစစ်ဘိုနဲ့ထွက်ပြေးသွားပြီပေါ့။ နောက်နေ့ကျမှသတင်းရတယ်။ဟုတ်တယ်။ကြောင်ပါးနဲ့မအိပြေးတယ်။ဝေးဝေးမဟုတ်ဖူး၊ကျနော်တို့အန္တရာယ်စိုးရိမ်လို့သုံး၊ လေးရက်တော့ တခြားနေရာရှောင်လိုက်တယ်။ သိတ်မကြာခင် မအိ စခန်းထဲပြန်ရောက်လာတယ်။ ဒါပေမဲ့ ကသဲကင်းစခန်းနားကပ်ရက်မှာသီးခြားရွက်ဖျင်တဲထိုးပြီးနေတာ။ ကသဲအရာရှိတွေကမအိကို ကြောင်ပါးနဲ့လက်ထပ်ဖို့သဘောမတူဖူး။ ဥပဒေကကိုခွင့်မပြုတာ။မအိကနိုင်ငံခြားသား၊ဒုက္ခသည်၊အစ္စလမ်ဘာသာဝင်၊ ကြောင်ပါးက ကသဲဇာတ်မြင့် ဘရမ္မာန်အမျိုးအနွယ်၊ လူပုံကခတ်ဖြောင့်ဖြောင့်၊အမြဲပြုံးပြီးပါးချိုင့်နဲ့လူချော။ ပြီးတော့သူကမဏိပူရလူမျိုးထဲမှာ ဧ၀ရက်တောင်ကို ပထမဆုံးတက်နိုင်တဲ့ပုဂ္ဂိုလ်တဲ့။ဂုဏ်ရှိနေတယ်။ သူပြောပြလို့ နောက်မှသိရတာ၊ သူ့မှာအဲဒီအချိန်က မိဘတွေက ဆရာဝန်မတယောက်နဲ့စေ့စပ်ထားတယ်ဆိုပဲ။ ထားပါတော့ ဆိုချင်တာက ကြောင်ပါးဘက်က အသိုင်းအ၀ိုင်းတွေက လုံးဝသဘောမတူဖူး။ ကျနော်တို့စခန်းကလူတွေကလည်း ဒါဟာကျနော်တို့ နိုင်ငံနဲ့လူမျိုးကို စော်ကားတာ။ လက်မထပ်ပဲပေါင်းသင်းတာလက်မခံဖူး။ ကိုယ့်ဒုက္ခသည်စခန်းကအမျိုးသမီးကို လှည့်ဖြားပေါင်းသင်းတယ်။လက်ထပ်ပြီးသီးခြားလည်းမနေဖူး။ ဒီစခန်းဝင်းထဲမှာပဲ သီးသန့်တဲထိုးပြီးအတူနေတယ်။ ကိုယ့်လူမျိုးနဲ့နိုင်ငံကိုပါစော်ကားတာလို့မြင်နေတယ်။ သူတို့နှစ်ယောက်လုံးကို ကျနော်တို့သိတ်မကြည်ကြဖူး။ မအိတို့ဖြစ်ရပ်ကလည်း တကယ်တော့ကျနော်တို့စိတ်ထဲက အငုတ်တွေ၊ခံပြင်းစိတ်တွေပိုတိုးလာတာပါပဲ။ နဂိုကမှ အဆင်မပြေတဲ့ကြား ဒီကိစ္စက ခံပျင်းစရာဖြစ်နေတယ်။ သူတို့အချစ်ဇာတ်လမ်းက အဲဒီမှာတင်မပြီးသွားဖူး။ နောက်ဆယ်နှစ်လောက်အကြာ သူတို့လင်မယားနဲ့ပြန်ဆုံတော့ လင်မယားနှစ်ယောက်လုံး သူတို့ဇာတ်လမ်းကို ပြန်ပြောပြတော့လည်း တကယ့်အဖြစ်အပျက်တွေဟာ ရုပ်ရှင်တွေ၊စိတ်ကူးယဉ်ဝတ္တုတွေလို အတော်ဆန်းကျယ်တာပဲ၊ ကံအကြွေးတွေနဲ့ ကြမ္မာရဟတ်ကြီးက လည်နေတတ်ပါလားလို့လည်း တွေးမိနေတော့တယ်။ ကျနော်တို့အားလုံးဟာ အတိတ်ဘ၀၀ဋ်ကြွေးတွေနဲ့ ရေစက်တွေကြောင့် ဒီနေရာကျဉ်းကျဉ်းလေးမှာလာဆုံကြ၊ပျော်ရွှင်ကြ၊ပြီးတော့ ကြေကွဲကြ၊ ၀မ်းနည်းကြ၊ ဒေါသတွေထွက်ကြ၊ နာကျည်းကြ၊ ခွင့်လွှတ်ကြ၊ အခဲမကြေတွေဖြစ်ကြနဲ့။ တကဲ့ကိုဘ၀ရုပ်ရှင်ကားတကားပါပဲ။ နောက်ပိုင်းဆက်ပြောပြမဲ့ ကျနော်တို့ ဘ၀တွေဟာ ပိုပြီးတော့ရုပ်ရှင်ဆန်နေဦးမလားမသိ……။ ကိုညို။ ၇ဖေဖ၀ါရီ၂၀၁၃။