သူတို့ခေါ်တော့ဒုက္ခသည်၊ကိုယ့်ကိုယ်ကိုတော့တော်လှန်ရေးသမား။- အပိုင်း(၆)

ဒီဆောင်းပါးရေးဖို့ပြင်ဆင်နေတဲ့အချိန်မှာအိန္ဒိယမြန်မာနယ်စပ်မြို့ဖြစ်တဲ့တမူးမြို့မှာ ကိုမင်းကိုနိုင်နဲ့ကိုပြုံးချိုတို့စာပေဟောပြောပွဲလုပ်တဲ့သတင်းကြားတယ်။ တချိန်ကဒီမြို့လေးကိုရောက်လာတဲ့တခြားနယ်ကကျောင်းသားမှန်သမျှကို ဖမ်းဆီးစစ်ဆေးပြီးထောင်ထဲပို့တာ၊မိဘရပ်ဆီလွှဲပြောင်းတာတွေခံခဲ့ရပြီး၊ အခုနှစ်အစိတ်လောက်ကြာတဲ့အခါမှာတော့ကျောင်းသားခေါင်းဆောင်တွေကိုယ်တိုင် အဲဒီမြို့မှာထင်ထင်ပေါ်ပေါ်နဲ့ဟောပြောမှုတွေလုပ်နေပြီဆိုတော့.. ကျနော့်ဟာကံကြမ္မာရဲ့လှည့်ဖျားမှုတွေကိုသွားဆင်ခြင်မိတယ်။ ၁၉၈၈အာဏာသိမ်းပြီးစနယ်စပ်မြို့တွေဖြတ်ပြီးတဖက်နိုင်ငံအစွန်အဖျားတွေကို (ထိုင်း၊အိန္ဒိယ၊တရုတ်)ကျနော်တို့ကျောင်းသားတွေ..တော်လှန်ရေးလုပ်ဖို့ထွက်ခဲ့ကြတယ်။ အဲဒီတုံးကဓားကိုဓားချင်း၊လှံကိုလှံချင်းဆိုတဲ့စိတ်ဓာတ်တွေနဲ့ပေါ့။ အဲဒီတုံးကဒီလိုနယ်စပ်မြို့ပေါ်မှာကျောင်းသားအရွယ်လူငယ်မျက်နှာစိမ်းတွေဆို ခိုးကြောင်ခိုးဝှက်သွားလာရတာ။အကြောက်အလန့်ကြီးတဲ့ အဲဒီတုံးကစစ်အာဏာပိုင်တွေဟာနိုင်ငံချစ်စိတ်ရှိသူလူငယ်တွေကို သူခိုးဂျပိုးလိုဆက်ဆံခဲ့ကြတယ်။ကျောင်းသားလူငယ်တွေကိုလက်ခံမိရင် အိမ်ရှင်တွေကိုဖမ်းချုပ်တယ်။ခုခေတ်လိုသာဆိုလူကုန်ကူးတဲ့အမှုနဲ့တရားစွဲမှာသေချာတယ်။ အခုကွယ်လွန်သွားပြီဖြစ်တဲ့တမူးမြို့သားကိုတင်ဝင်း(လူ့ဘောင်သစ်)ဆို အဲဒီတုံးကတမူမြို့ပေါ်ရောက်လာတဲ့ကျောင်းသားလူငယ်မှန်သမျှကို ကုန်သိုလှောင်တဲ့ဂိုဒေါင်တွေမှာပုန်းခိုစေပြီးမိုးရေးဘက်တသုတ်ပြီးတသုတ်ပို့နေတာ။နောက်ပိုင်း အိန္ဒိယဘက်တောခိုဖို့လာသူမှန်သမျှကိုတင်ဝင်းဂိုဒေါင်နဲ့မကင်းဖူး။ကြာတော့ကိုတင်ဝင်းကိုယ်တိုင်လည်းမခံနိုင်တော့ဖူး ၊ပြေးရတော့တာပဲ။နောက်ဆုံးဒုက္ခသည်စခန်းမှာပဲခေါင်းချသွားလေရဲ့။ စခန်းနောက်ဖက်မှာသူ့အုတ်ဂူလေးရှိနေတယ်။တကယ်တော့စာသင်သားဘ၀ကျဉ်းကျဉ်းမှာ အတွေ့အကြုံနုနုသာရှိသူတွေဟာအင်မတန်မှကြမ်းတမ်းခက်ထန်လှတဲ့ တော်လှန်ရေးလမ်းပေါ်ရောက်တဲ့အခါစိတ်ကူးနဲ့လက်တွေ့လုံးဝလွဲမှားနေမှန်းနောက်မှသိရတယ်။ -------- အိန္ဒိယနယ်စပ်ရောက်ကျနော်တို့အယောက်၄၀လောက်ကို၊ မဏိပူရပြည်နယ်လုံခြုံရေးတပ်(ချန်ဒယ်ခရိုင်အမှတ်၈ရိုင်ဖယ်တပ်ရင်း)ကမိုးရေးမှ တဆင့်နည်းနည်းအတွင်းပိုင်းကျတဲ့(ချန်ဒယ်ခရိုင်)ထဲစစ်ထရပ်ကား၃စီးနဲ့ခေါ်သွားကြတယ်။ ညမိုးချုပ်ကြီးဆိုတော့..ဘယ်ခေါ်သွားမှန်းလည်းမသိဖူး။ဘယ်ဆီဘယ်ဝယ်သွားပြီး၊ ဘာမှန်းညာမှန်းမသိရပေမဲ့ကျနော်တို့ပျော်နေတယ်၊တက်ကြွနေတယ်။ စိတ်အထင်၁နာရီခွဲလောက်မောင်းရမယ်ထင်တယ်၊လမ်းပိတ်ထားတဲ့လုံခြုံရေးဂိတ်တချို့ကိုလည်းဖြတ်ရတယ်။ ကျနော်တို့ရှမ်းပြည်ကလမ်းတွေအတိုင်းပဲ၊အကွေ့အကောက်၊တဘက်ဂျောက်၊ တဘက်တောင်နံရံနဲ့တောင်ပေါ်လမ်းဖြစ်တယ်။မိုးရေးကနေ“ပါလဲ”ဆိုတဲ့မြို့ (ဒုတိယကမ္ဘာစစ်ကဂျပန်တပ်တွေအခြေစိုက်ခဲ့သလိုဗြိတိလျှတပ်တွေတိုးစစ်ဆင်ခဲ့တဲ့သမိုင်းဝင်မြို့) အထိတောက်လျှောက်တောင်တက်လမ်းဖြစ်တယ်။“ပါလဲ”ရောက်တော့လမ်းခွဲ၂ခုရှိတယ်။ တခုကလွင်ပြင်ကြီးဖြစ်နေတဲ့မဏိပူရမြို့တော်အင်ဖားဘက်သွားတဲ့လမ်းခွဲ၊နောက်တခုကတောင်ပေါ်လမ်းဖြစ်တဲ့ ချန်ဒယ်ခရိုင်ကိုသွားတဲ့လမ်းခွဲပါ။ကျနော်တို့ကိုချန်ဒယ်ဘက်ခေါ်သွားတာဖြစ်တယ်။ တိတိကျကျပြောရင်ချန်ဒယ်ခရိုင်မြို့လေးမရောက်ခင်၃မိုင်လောက်မှာရှိတဲ့ အမှတ်(၈)မဏိပူရရိုင်ဖယ်တပ်စခန်းရှိရာလိုင်ခွန်း(Leikun)စစ်စခန်းဆီကိုဖြစ်တယ်။ အဲဒီစစ်စခန်းရဲ့အထက်တောင်ကုန်းမြင့်ကြီးတခုမှာရှိတဲ့ဆောက်ပြီးစစ်တပ်ဆေးရုံလေးမှာကျနော်တို့ကို ယာယီနေထိုင်ခွင့်ပေးထားတာဖြစ်တယ်။တောင်ကုန်းထိတ်မှာရှိတဲ့ဆေးရုံဆောင်က သိတ်ကြီးတာတော့မဟုတ်ဖူး။ကုတင်ထားမယ်ဆိုရင်အလွန်ဆုံးကုတင်၃၀ဘဲဆန့်နိုင်တဲ့ ဘာမှမရှိတဲ့ခမ်းမဆောင်ကြီးတခုရယ်ညာဘက်ဘေးကပ်ရက်မှာ၆ပေx၁၀ပေလောက်ရှိတဲ့ ရှည်မျောမျောအခန်းတခုရယ်၊ဘယ်ဘက်ဘေးမှာအိမ်သာ၂လုံးရယ်..ဒါပဲ။တောင်ကုန်းပေါ်မှာ သွပ်မိုးအုတ်တိုက်နီကျံကျံဆေးရုံအသစ်စက်စက်ကထီးထီးကြီးတခုထဲ။ ညကြီးမင်းကြီးကျနော်တို့ကားပေါ်ကဆင်းတန်းစီနေရာယူတော့ မဏိပူရတပ်ရင်းမှုးအရာရှိကကြိုဆိုတဲ့အကြောင်းနှုတ်ခွန်းဆက်တယ်။ပြီးတော့ ဒီအဆောက်အဦးမှာယာယီတည်းခိုဖို့စီစဉ်ထားတဲ့အကြောင်း ၊နောက်တနေ့မှအောက်ခံတမံသလင်းပေါ်၊ကောက်ရိုးတွေခင်းပြီးနွေးထွေးအောင်စီစဉ်ပေးမဲ့အကြောင်း၊ အစားအသောက်ကိုသူတို့ကချက်ပြုတ်စီမံပေးရမလား၊ ကိုယ့်ဖာသာချက်ပြုတ်စီစဉ်မလားမေးတယ်။ကျနော်တို့ဘက်ကမိမိဖာသာစီစဉ်မဲ့အကြောင်းပြောတော့ သူတို့ကနောက်တနေ့မှာအိုးခွက်ပန်းဂံတွေနဲ့ရိက္ခာတွေပေးပို့မဲ့အကြောင်းပြောတယ်။ပြီးတော့ဒီညတော့ သူတို့ချက်ပြုတ်ထားတဲ့အစီအစဉ်အတိုင်းစားသောက်ဖို့နဲ့.. အဆောက်အဦးကအသစ်စက်စက်ဖြစ်လို့သောက်သုံးရေလှောင်ကန်မရှိသေးတဲ့အကြောင်း. .လောလောဆယ်..အိမ်သာ၂လုံးကိုလုံးဝအသုံးမပြုပဲယာယီကျင်းတူးအိမ်သာပဲအသုံးပြုစေချင်ကြောင်း၊ ဘာဖြစ်လို့လဲဆိုအဆောက်အဦးဘယ်ဘက်မလှမ်းမကမ်းမှာ ကန်ကရစ်မြေအောက်မိလ္လာကန်၂လုံးကိုယာယီသောက်သုံးရေလှောင်ကန်အဖြစ်သုံးထားတဲ့အကြောင်းအသိပေးပါတယ်။ အရေးကြီးတာတခုကအဆောက်အဦးပရ၀ုဏ်သံဆူးကြိုးပတ်ပတ်လည်ကာရံထားပြီးဝန်းအပြင်မထွက်ဖို့၊ လက်နက်ကိုင်လုံခြုံရေးအစောင့်အကြပ်တွေရှိနေတဲ့အကြောင်း၊သူတို့ခွင့်ပြုချက်နဲ့သာအပြင်ထွက်ဖို့ဆိုပြီးမှာပါတယ်။ အဲဒီညကကျနော်တို့တတွေမိုးရေးမြို့ကုန်သည်ကြီးများအသင်းကပေးလိုက်တဲ့၂ထပ်ဘာဘူစောင်ကိုတထည်အောက်ခံ တထည်ခြုံပြီးမဏိပူဆောင်းညကိုအံတုကွေးခဲ့ရတယ်။ စည်းကမ်းထိမ်းသိမ်းရေးမှုးကိုဂြိုလ်တု(ကွယ်လွန်)ရဲ့တရွှီရွှီဝီဇီမှုတ်သံနဲ့ထကြထကြဆိုတဲ့အသံကြောင့် ကျနော်တို့ကမန်းကတန်းထကြတယ်။တပ်စု၎စုခွဲပြီးကိုယ့်အစုနဲ့ကိုယ်တန်းစီဖို့အသင့်ပြင်တယ် ကျနော်တို့ကိုစောင်ခေါက်နည်း၊အိပ်ရာသိမ်းနည်းတွေကိုကိုယ့်လူတွေကပဲစနစ်ကျအောင်သင်ပေးထားတယ်။ ဖိနပ်တွေကိုကိုယ့်တပ်စုနဲ့ကိုညီညီညာညာချွတ်ခိုင်းတယ်။မညီသူကိုအပြစ်ပေးဒိုက်ထိုးခိုင်းတယ်။ လူကလည်းနည်း၊စိတ်ဓာတ်တွေကလည်းတက်ကြွနေတော့သိတ်ညီတယ်။စည်းကမ်းအတိအကျလိုက်နာတယ်။ မနက်အပြင်ထွက်တန်းစီတော့မြူတွေပိတ်နေတယ်။ရာသီကအေးစိမ့်နေတယ်။ရေခဲမှတ်နီးနီးပဲ။ တခါတလေရေခဲအောက်ထိအေးတယ်၊အပြင်မှာအကျီလှမ်းထားရင်ရေခဲမှုံတွေတက်ပြီး အကျီင်္ကချပ်ပြားကြီးလိုတောင့်တောင့်ကြီးဖြစ်နေတယ်။နေထွက်လာမှပြန်ခြောက်တာ။ ယာယီအိမ်သာကလည်းကျင်းတူးပြီးဝါးကပ်ထရံလေးပတ်လည်ဝိုင်းပြီးကာထားတာ။ယောက်ကျားတလုံး၊ မိန်းခလေးတလုံး။မိန်းခလေးက၂ယောက်ထဲ၊ယောကျာင်္းက၃၀ကျော်။ အိမ်သာမလောက်လို့သံဆူးကြိုးလေးအသာမပြီးစကပ်ပင်တောထဲစခန်းသွားကြသူများတယ်။ စကပ်တောကြီးကလည်းထူထူထပ်ထပ်၊နောက်တော့လည်းအဲဒီစကပ်ပင်တွေဒုက္ခသည်တွေရဲ့ထင်းဖြစ်ကုန်တာပဲ။ အိမ်သာမလောက်လို့တောထဲဖြစ်သလိုသွားကြတော့နောက်ပိုင်းရက်အတော်ကြာတဲ့အခါအံ့သြစရာကောင်းလောက်အောင်.. ယင်ကောင်တွေ၊ယင်ကောင်တွေ..အရမ်းပေါလာတယ်။ထမင်းချက်တဲ့နေရာနဲ့အိမ်သာထဲတင်၊ ယင်တွေလုံးခဲနေတာမဟုတ်ဖူး၊ညအိပ်ရင်တောင်ယင်ကောင်တွေကအနားမယူဘဲ အွန်ဂျူတီဆင်းပြီးမျက်နှာနဲ့ကိုယ်ပေါ်နားပြီးနှိပ်စက်တာခံရတယ်။နောက်ပိုင်း စည်းကမ်းထိမ်းသိမ်းရေးမှုးကိုဂြိုလ်တုကယင်ကောင်၁၀၀ကို ဘီဒီဆေးလိပ်(ကုလားတွေသောက်လေ့ရှိတဲ့ပွတ်ချွန်းဆေးလိပ်သေးသေး)တလိတ်နဲ့နှိမ်နင်းတာတောင်မကုန်ဖူး။ သိတ်မကြာဖူး၊၀မ်းရောဂါတွေဖြစ်ကုန်တယ်။ကျန်းမာရေးထိခိုက်တော့စိတ်ဓာတ်အကြီးအကျယ်ကျကုန်တယ်။ အဲဒါနောက်ပိုင်းကျဖြစ်လာတာတွေပေါ့။ တကယ်တော့အိန္ဒိယအစိုးရကမြန်မာဒုက္ခသည်တွေကိုလက်ခံနေပါပြီလို့ကမ္ဘာသိကျယ်ကျယ်လောင်လောင်ကြေငြာခဲ့ပေမဲ့.. ဒုက္ခသည်တွေအတွက်ဘာတခုမှကြိုတင်မစီစဉ်ထားပါဖူးဆိုတာထင်ရှားပါတယ်။ ကျနော်တို့ဒုက္ခသည်တွေဟာနောက်ပိုင်းမှာလူဦးရေအရ၂၀၀၀န်းကျင်ပဲရှိခဲ့တာပါ။ ကျနော်တို့တတွေကိုအစာလုံလောက်အောင်မကြွေးမွေးဖူး ၊စောင်မလုံလောက်ဖူး၊အိပ်စရာ၊ကျောခင်းစရာတောင်မလုံလောက်ခဲ့ဖူး။ဆေးဝါးဆိုလည်းဝေလာဝေးပါ။ ဒီကိစ္စတွေနောက်ပိုင်းမှာရေးပါအုံးမယ်။ ကျနော်တို့ဒုက္ခသည်စခန်းရဲ့တောင်ကုန်းပတ်ပတ်လည်သံဆူးကြိုးနဲ့ကာထားပြီး အနောက်ဖက်ထွက်ပေါက်မှာရွက်ဖျင်တဲ၂လုံးနဲ့လက်နက်ကိုင်မဏိပူရစစ်သားတွေစောင့်နေတယ်။ သတိထားမိတာတခုကအိန္ဒိယနယ်ခြားစောင့်လက်နက်ကိုင်စစ်သားတွေရော၊ အခုကင်းစောင့်မဏိပူရရဲဘော်တွေရောသူတို့သေနပ်ကိုသံကြိုးနဲ့တုတ်ပြီးကိုယ့်ခါးနဲ့တွဲချီထားတာပဲဖြစ်တယ်။ ။ခတ်နောက်နောက်တမူးနယ်သားတယောက်ကတော့ဗမာတွေသေနပ်လုပြေးတတ်လို့ပါလို့ပြောတယ်။ တိုက်ပွဲမှာကျရင်ကိုယ့်လက်နက်ကိုရန်သူကအလွယ်တကူကောက်ယူပြေးလို့မရအောင်လို့ဖြစ်မှာပါ။ ကျနော်တို့အားလုံးကျန်းမာရေးလေ့ကျင့်ခန်းတွေတန်းစီလုပ်ကြတယ်။တောင်ကုန်းလေးပေါ်မှာပဲပတ်ပြေးကြတာ .တပ်မတော်ကစစ်သားသစ်လေ့ကျင့်ရေးစခန်းမှာအော်ဟစ်ပြေးသလိုပေါ့. “ဘာလုပ်နေလဲ.လေ့ကျင့်နေတယ်၊ဘာစိတ်ဓာတ်လဲ.ခွတ်ဒေါင်းစိတ်ဓာတ်၊ဘယ်သူ့အတွက်လဲ.ပြည်သူ့အတွက်”။ ဘိုက်ဟောင်းလောင်းနဲ့လေ့ကျင့်ခန်းလုပ်ပြီးမောမောပမ်းပမ်းဖြစ်နေပေမဲ့ကသဲစစ်သားတွေကထမင်းလာမပို့သေး။ ဗမာတွေကမွန်းမတည့်မီနေ့လည်စာစားတတ်ပေမဲ့သူတို့ကမွန်းလွဲ၁နာရီလောက်မှထမင်းစားတတ်တာ။ ကျနော်တို့ရောက်ပြီးနောက်တရက်ထိသူတို့ချက်ပြုတ်တာပဲစားရတယ်။အိုးခွက်၊ပန်းဂံနဲ့ရိက္ခာကိစ္စစီစဉ်လို့မပြီးတာမို့ပါ။ မှတ်မှတ်ရရရှိနေတာတခုပြောရအုံးမယ်။.ညကျတော့လူကြီးတွေကထမင်းအရင်စားတယ်။ ကျနော်တို့ကဆရာဦးရွှေထူး(မန္တလေး)ဒေါက်တာအောင်ကျော်ဦး(ယခ္ခုမဏိပူရ၊သင်္ကြန်သံချပ်ရေးတဲ့ကဗျာဆရာမြတ်ထက်) ပန်းချီစစ်ငြိမ်းအေး(ယခ္ခုအမေရိကား)စာရေးဆရာကောလ်ထန်မောရိယယ်လ်(ကွယ်လွန်)နဲ့မန်းဆေးတက္ကသိုလ်က.ကိုဘရန်(ကိုသိန်းဌေး-အမေရိကား)ကျော်ကျော်ထွဋ်(အမေရိကား)တို့ကိုဦးစီးအဖွဲ့ခေါင်းဆောင်တင်ထားတာ.. သူတို့ကအရင်စားတယ်။ကျနော်နဲ့ရဲဘော်တချို့အပြင်မှာမီးလှုံနေရင်းဆရာထူးက “မောင်ညိုရေ..သောက်ရေပြတ်နေတယ်၊သွားခတ်လိုက်ပါအုံးကွာ”လို့ခိုင်းလို့ရေပုံး၂ပုံးဆွဲပြီး. အိမ်သာနောက်ဖက်ကွန်ဂရစ်ရေလှောင်ကန်လေးထဲကရေသွားဆွဲတယ်။ ကျနော်ကမျက်မှန်သမား၊ညကြီးဆိုတော့သိတ်လည်းမမြင်ရဖူး။ရေပေါ်ပေါလောပေါ်နေတဲ့အမှိုက်သရိုက်တွေရှင်းပြီးသောက်ရေဆွဲလာတယ်။ ဦးစီးအဖွဲ့ထမင်းစားပြီးရေသောက်တယ်။ကသဲတွေကလည်းသောက်ကြတယ် ။ရေပြတ်သွားလို့နောက်ထပ်ရေသွားဆွဲဖို့အိမ်သာနောက်သွားတော့ဆရာထူးက “မောင်ညို..မင်းဘယ်ကရေသွားခတ်မှာတုံး”လို့မေးတယ်။“အိမ်သာနောက်ကရေလှောင်ကန်လေ”လို့ဖြေတော့. “အာ..လခွီးမှပဲ..သွားပါပြီကွာ”လို့ပြောပြီးထွီထွမ်နဲ့တံတွေးထွေးပါတော့တယ်။ကျနော်လည်းကြောင်သွားတယ်။ အားလုံးက“ချီးရေတွေ..ချီးရေတွေ”နဲ့တ၀ါးဝါးဟားပြီးဝိုင်းအော်တယ်။ဆရာထူးက “သွားသွားပုံးထဲကရေတွေမြန်မြန်သွန်..သေချာသွားဆေး၊၀မ်းရောဂါတွေဖြစ်ကုန်တော့မှာပဲ..ဒုက္ခပဲကွာ”လို့ငြီးတယ်။ မတတ်နိုင်ဖူးလက်လွန်သွားပြီ။ အမှန်ကညနေပိုင်းမှာရေတိုင်ကီတွေရောက်လာလို့သောက်ရေသုံးရေကိုနဂိုကသုံးတဲ့အိမ်သာမိလ္လာရေလှောင်ကန်အသစ်ကိုမသုံးတော့ပဲ.. အသစ်ရောက်တဲ့ရေတိုင်ကီကြီးတွေပဲသုံးတာဖြစ်တယ်။ တခါးပိတ်ထားတဲ့အိမ်သာအသစ်ကြီးကိုလည်းအသုံးပြုနိုင်ပြီလို့ ညနေကပဲဖွင့်ပေးလိုက်တာကြောင်းအမျိုးသမီးနှစ်ယောက်နဲ့ကျောင်းသားတချို့ဈေးဦးပေါ့က်ဆိုပြီး အခင်းကြီးအခင်းလေးတွေသွားပြီးကြပြီ။နောင်အခါသတင်းထောက်ဖြစ်မဲ့ကျနော်ကအဲဒီအင်ဖော်မေးရှင်းကိုမရလိုက်ဖူး။ ဒါနဲ့မိလ္လာကန်ထဲကရေခတ်ပြီးဦးစီးအဖွဲ့ကိုသွားတိုက်မိတာ..။အဲဒီနောက်ပိုင်းကျနော့နာမည်လည်းလအတန်ကြာထိ ကိုညိုကနေ..“အီးညို”လို့ပြောင်းသွားတယ်။တခါတလေ..ရှေးဟောင်းနှောင်းဖြစ်တွေပြန်ပြောတိုင်း ကျနော့်ကိုရေခတ်ကူပေးတဲ့ကိုအောင်ဆန်းလင်း(ကလေးမြို့၊ယခ္ခုသြစတေးလျှား)က.. “ကိုညိုရေ..အဲဒီတုံးကခင်ဗျားခေါင်းဆောင်တွေကိုချီးရေတိုက်ပြီးနာမ်နှိမ်လိုက်လို့ဖြစ်မယ် ၊နောက်ပိုင်းခေါင်းဆောင်ချင်းလည်းမတဲ့၊အဖွဲ့လည်းကွဲတော့တာပဲလေ”လို့ပြောတယ် ။ဒေါက်တာဘရမ်ဆိုရင်..နှစ်အတန်ကြာထိကျနော့်ကို“ချီးညို..ချီးညို”နဲ့နောက်ပြောင်ပြီးခေါ်တုံး..။ ကိုညို(အော်စလို)